Os alumnos de 6º curso do CEIP A Rúa participamos a semana pasada nunha plantación de frondosas no Monte Pequeno, invitados polos comuneiros de Coiro. Plantamos cerdeiras, bidueiros, freixos, acivros e castiñeiros que bautizamos de xeito espontáneo cos nomes de coñecidos/as cineastas, con motivo do noso proxecto Cine en Curso, que estamos desenvolvendo estes dous últimos cursos.Todo xurdiu cando decidimos levar a cabo unha acción de mellora da contorna que nos rodea. En principio pensamos en repoboar un monte queimado. Falamos cos comuneiros de Moaña que coñecía a nosa compañeira Mar. Eles déronnos unha charla moi interesante sobre incendios e o papel da comunidade de montes na conservación dos nosos espazos verdes. Indicáronnos que repoboar un monte queimado era perigoso polos residuos tóxicos. Propuxéronnos falar coa comunidade de montes de Coiro e replantar algunha zona próxima ó colexio. Así fixemos.
Foi unha xornada marabillosa, Manolo Soaxe e Miguel foron ensinándonos polo camiño plantas e árbores, distinguindo as autóctonas das foráneas. Levabamos un plano e iamos situando os barrios, os cruceiros, as fontes... Unha vez en Monte Pequeno, os comuneiros tratáronnos de marabilla, falándonos do seu amor e dedicación ó monte e da necesidade de relevo xeneracional. Dende aquí queremos animar a todos os veciños de Coiro a participar con eles nesta laboura tan importante. Rematamos cunha merenda en Monte da Pena e coa promesa de regar as nosas árbores en verán e colocarlles un cartel co seu nome de cine. O pai de Xoel vainos axudar a gravar as letras nuns cachos de madeira procedentes de palés que reutilizaremos. Será xenial!
No vídeo que segue, un dos comuneiros explícanos a lenda da pedra da Pena, onde seica había unha doncela encantada que...
