Festa do Entroido 2012

Hoxe celebramos no cole de A Rúa a festa do Entroido. Participamos todos nun desfile ao redor do cole cos traxes que fixeramos os días previos, coa axuda das nosas nais e pais e tamén dos nosos profes.

Antes do desfile, para coller forzas, inchámonos a comer orellas, filloas e outras lambonadas que trouxeramos da casa.

Así que despois do recreo preparámonos coas nosas galas e saímos ao patio para o desfile. Cada ciclo de infantil e primaria levaba un traxe diferente:



Os nenos e nenas de infantil iamos disfrazados de astronautas da NASA, co traxe espacial, a maleta de aire, e tamén levamos o noso foguete para ir ao espazo.

 Os nenos e nenas de primeiro ciclo disfrazámonos de chuvia, con nubes, raios, pingas, vento e todo fenómeno atmosférico que se relacionase. Tamén fomos os encargados de levar o estandarte do desfile.

Os nenos e nenas de segundo ciclo fomos co disfraz de soldadiños de chumbo, con gorro, escopetas, e como non... tamén co acompañamento dos tambores.

Os nenos e nenas de terceiro ciclo disfrazámonos de exipcios, e iamos adornados con colares, pulseiras, diademas, aneis... e pintadiños tal cal os exipcios.

Ao rematar o desfile xuntámonos no patio e cada ciclo de infantil e primaria cantou e bailou as coplas que tiña ensaiadas. Todos estiveron moi ben, pero especialmente os de terceiro ciclo co seu baile exipcio, que foi moi aplaudido.

 Xa de colofón, só quedou queimar o meco, e hai que dicir que se resistiu á fogueira, pois por un fallo técnico caíu ao chan antes de arder, e non lle quedou máis que consumirse alí mesmo, a pesar dos intentos de reanimación dun espontáneo do público.

Podedes ver o resto das imaxes nesta presentación: